Wó projekśe

Mjazynarodna organizacija E@I, se zepěrajuca na źěło něźi 250 dobrowólnicow a dobrowólnikow, pódpěra interkulturelne wuknjenje w interneśe. Jeje projekty, ako wutwóriju zakład za deutsch.info, su wěcejrěcne internetowe boki, źož móžotej se wuknuś esperanto (lernu.net) a słowakšćina (slovake.eu). Mimo wuwijanja wuknjeńskich portalow E@I teke organizěrujo wšakorake iniciatiwy na pólu wuknjenja rěcow a nowych technologijow.

bit (= best in training) schulungscenter (rozwucowański center), załožony 1986, jo jaden z wjeźecych póbitowarjow kubłańskich móžnosćow we wobłuku projektow na źěłowych wikach, pówołańskego kubłanja a treninga w Awstriskej. Jich móc lažy w nazgónitosći a know-how pśi wugótowanju (didaktiki, metodologije a wuwucowanja) a pśi zwopšawźenju rozdźělnych narodnych a mjazynarodnych projektow. Pśez swóju źěłabnosć maju pśisłušne nazgónjenja pśi źěle ze wšakorakimi celowymi kupkami, na pś. z młodymi luźimi, młodymi bźezdźěłabnymi dorosćonymi a jich kubłańskeju pótrjebu.

Uniwersita we Wilniusu jo se załožyła w 16. stolěśu a jo jadna z nejstaršych uniwersitow w srjejźnej a pódzajtšnej Europje. Rěcne studije su how wažny wobstatk uniwersitnego wukubłanja. Tegdy su se łatyńšćina, stara grichišćina a hebrejšćina wuwucowali. Pótakem su se rěcy how južo wuwucowali, nježli až w lěśe 1579 jo z kolegiuma Jezuitow nastała uniwersita, a to lěcrownož jo se Filologiska fakulta akle w lěśe 1944 załožyła. Institut za rěcy a kultury baltiskich krajow zgromaźijo slěźaŕki a slěźarje powšykneje linguistiki, baltistiki, germanistiki, polonistiki, rusisitiki a skandinawistiki ako teke wjele drugich. Tradicije wuwucowanja rusojskeje rěcy, literatury a kultury (Rusojski filologiski wótrěd jo se załožył 1803) wuspěšnje koeksistěruju z doprědkaŕskimi a modernymi wuceńskimi metodami, což se pokazujo w aktiwnem wobźělenju cłonkow togo wótrěda w mjazynarodnych projektach a wědomnostnych zarědowanjach.

Uniwersita Adama Mickiewicza (AMU) w Poznanju, tak pomjenjona za sławnym pólskim basnikarjom romantiki, jo slěźaŕska uniwersita a jadna z nejwažnjejšych pólskich uniwersitow. Wóna jo se załožyła 1919, ale jeje stolětna reputacija se zakłada na dłujkej tradiciji wušego kubłanja w měsće Poznań, segajucej slědk do 16. stolěśa (Akademia Lubrańskiego - łatyński: Collegium Lubranscianum; załožony 1518 w Poznanju). Źinsajšna uniwersita ma 3.000 pśistajonych, ako póbituju swójim 40.000 študańcam - mjazy nimi 1.300 doktorandow - 193 studijnych pśedmjatow. Uniwersita jo zagronita za wěcej ako 8.000 publikacijow kužde lěto a se wobźělijo na 600 narodnych a mjazynarodnych projektach. Wóna se rozrědujo do 20 fakultow, źož se slěźi na wšakorakich pśirodowědnych, towarišnostnowědnych a duchnowědnych pólach. Na tśich fakultach uniwersity se zaběraju z rěcnymi studijami a 50 rěcow se tam wuwucujo. Wjele rěcnych kursow jo Polska Komisja Akredytacyjna wuznamjeniła a zarědowała do nejwušeje kategorije, z cymž se wobtwarźijo wuběrna fachowa kompetenca wucecych ako teke wužywanje modernych wucbnych metodow a nabejne studijne wugbaśa. Fakulta modernych rěcow a literaturow jo jadna z nejwětšych uniwersity a na njej se teke pódawa nejwětša licba rěcnych kursow. Na jeje Instituśe za etnolinguistiku wuwucujo personal z 15 krajow wěcej ako dwanastk rěcow w šesć wšakich pśedmjatach.

Lipšćańska uniwersita, załožona 1409, jo slěźeńska uniwersita, kenž póbitujo kubłanje w bogatej a wjelebocnej slěźeńskej wokolnosći za někak 30 000 študańcow, ako se wukubłuju wót něźi 400 fakultnych sobuźěłaśeŕkow a sobuźěłaśerjow. Wjeleserakosć 14 fakultow (wót mediciny k pśirodnym wědomnosćam, wót matematiki k teologiji a wót socialnych wědomnosćow k sportoju) zarucyjo wuběrne móžnosći za interdisciplinarne źěło. Jeje na cełem swěśe jadnorazny Institut za sorabistiku se zaběra ze slěźenim na serbskima rěcoma a drugich mjeńšynowych rěcach, jich literaturu a kulturu ako teke z wukubłanim wucabnicow a wucabnikow. We lětach pó politiskem pśewrośenju 1989 jo se wjele pjenjez do slěźeńskeje infrastruktury inwestěrowało, tak až jo Lipšćańska uniwersita źinsa wjelgin derje wugótowana institucija.